18 jul 2017

Ikshitachti: Kuskatan mawiltia itech ne Ejestadoj Senputzujtuk

Yewipta ne ikshitachti tepewa ipal Kuskatan kitzkij ne itakil 1 tech 1 kwak mawiltij itech Jamaica. Iwan ini itakil kipanultia ne achtu taksaya. Tik ne ukse taksaya iwan chikwey tepewa, yawi muishnamiki iwan ne Ejestadoj Senputzujtuk.

Tik ne achtu mawiltilis te welik itech Meshijku wan mupuluj 3 tech 1. Tik ne ka ume mawiltilis kianki yey tet, itech Curazao. Ne itakil katka 2 itech 0. Gerson Mayen kishtuk ne achtu tik ini muishnamikilis wan Rodolfo Zeyala muchiwki ne achtu mawiltiani ipal Kuskatan ne taishtuka tik yejyey muishnamikilis. Tik ne minutoj 42, Darwin Ceren kimatuk ne tachti wan Gevaro Nepomuceno mutalij kitaksa ne tachti. Melka uni, Derby Carrillo kitzakwilij. Tik ne ka yey wan tipan mawiltilis, mawiltijket itech Jamaica. Kuskatan kiwikak ne tachti ijtik matat tik ne minutoj 15, man ne ukse tepewa kinamiktij ne tamachiut.

Kuskatan kipanultij ne achtu taksaya ipal ne muishnamikilis iwan 4 tet, wan musta yawi mawiltia itech ne Ejestadoj Senputzujtuk (ESA). Ne ESA kinujnutzki yankwik mawiltianimet pal mawiltia itech Kuskatan. Muchi yejemet mawiltijtiwit miak tiempoj iwan ne tepewa pal ESA.

Kuskatan mutakentis istak itech ne tanutzani techan. Ne mawiltilis mutalijtuk musta ka 6:00 pm tik ne Lincoln Financial Field tik Piladelpia, kwak tantuka ne mawiltilis itech Costa Rica wan Panama.

ikshitachti fútbol
itech contra
kianki conseguió, agarró (de -ana)
kitzkij obtuvo (de -itzkia)
kimatuk lo tocó (de -matuka)
kishtuk metió (de -ishtuka)
kitzakwilij lo atajó, lo detuvo, lo impedió (de -tzakwilia)
matat red
mawiltia jugar
mawiltiani jugador, juguetón
mawiltilis juego
muishnamikilis competición, contención
mupuluj se perdió
mutakentia vestirse
-namiktia emparejar, igualar; juntar, unir
-nujnutza convocar
-panultia pasar, traspasar
tachti pelota
-takil fruto, resultado
-taksa patear
taksaya nivel, grado, paso
tamachiut marcador
tantuka ya ha termindo
tanutzani techan país anfitrión
tepewa grupo
tet piedra, punto

No hay comentarios: