23 sept 2016

Musewia se techan ini tayua

Ne tatuktiani pal Charlotte, ne wey techan tik North Carolina, kitalijtuk tik ini tunal se musewilis kan teaka weli nejnemi ka tatenpan itzalan tajkutayua wan tanesi.

Ashan ne yey tunal kan se miaktal teishnamiki tik ujti. Yejemet kitajtaniliat ne tajpianimet ma kineshtilikan ne videoj kan kilwitia tay panuk iwan Keith Lamont Scott, ne kipiatuya 43 shiwit. Yajini ne takat ká se tajpiani kimiktij.

Ne tajpianimet kineshtilijtiwit ne videoj ne imiakawan ne miktijtuk. Wan yejemet kinekit ma nusan kineshtilikan muchi ma kitakan. Melka uni, ne tajpianimet te kishwelitat uni tajtanilis ika kenhayuk nemit itajku ne taishtemulis.

“Kia, tiwalajket pal titeishnamikit, te welit tikwilewat ne yultechan. Uni te yawi kiekchiwa tatka” inak se teishnamikini.

Yalua, muchi pejki yek. Ne tajpianimet wan ne teishnamikit nemit ka sentapal. Melka, kwak pejki tayuaki, sekin pejket kijtakuat sejse tanamakaluyan wan tawikani. Ne tajpianimet nemituyat pal kinhishtiat.

Yajika, ashan ne tatuktiani kitalijtuk se musewilis pal teaka kijtakua tatka wan pal muchi ne chanejket yek nemit. Melka nemi ne musewilis, sekin kenhayuk teishnamikit.

  • -ijtakua dañar, arruinar
  • -ishwelita aprobar, agradar
  • -neshtilia hacer público, revelar
  • -tajtanilia exigirle, pedirle
  • -wilewa destruir
  • miaktal multitud
  • miktijtuk el que fue matado
  • musewilis descanso
  • -panpa a causa de
  • sentapal al otro lado
  • taishtemulis investigación
  • tajkutayua medianoche
  • tajpiani(met) policia(s)
  • tanesi amanecer
  • tatenpan afuera
  • teishnamiki protestar, levantarse en contra
  • yultechan centro (de la ciudad)

No hay comentarios: