28 ene 2014

Tay muneki muchiwa pal timumachtiat se taketzalis



Shimumachti mujmusta,
melka chiupichin!
Kwak nipejki nimumachtia ukse taketzalis, nimumakak cuentaj ka nemit sejse tay tiwelit tikchiwat pal timumachtiat yek wan talul. Taja nusan tiweli timumachtia Nawat su tikchiwa ini tay niaw nimetzilwia:

1. Shimumachti mujmusta

Shimumachti mujmusta su weli. Te muneki ma shimumachti miak horaj. Su timumachtia ijtik 20 ush 30 minutoj, nemi yek! Melka chiupichin, shimumachti muchi ne tujtunal, kiane tiaw tiweli tikelnamiki ne tay timumachtijtuk.


2. Shitaketza, shina senpa, wan shina tay titakakik

Pal timumachtiat yek se taketzalis, muneki ma titaketzakan yek. Yajika yek ma tinakan tay titakakit pal timumachtiat tinat yek.

Anka tiaw tishpinawa kwak tipewa, pero kenhaya! Maka shimajmawi, ka ijkiuni tiaw timumachtia.

Su inte tikajsi ká iwan tiweli titanutza ush su timajmawi, shitaketza iwan ne pelu, ne mistun ush hasta ne tijlanmet, yejemet yawit pakit metzkakit!

3. Shiamatachia

Shiamatachia muchi tay tiweli tik Nawat. Ne blog, ne yajyankwik, ne ajamat: muchi tay nemi tik Nawat, shiamatachia. Melka inte timumachtia titanutza yek ijkiuni, yawi metzpalewia pal tikmati miak palabraj.

4. Shiamatachia wan shitaketza

Kwak tikita se tajkwilujtuk, maka shina semaya tik muyulu, shina iwan mukupak. Ijkiuni tiaw titakaki, wan nusan tiaw timumachtia titanutza yek wan talul.

5. Shikaki tajtakwikalis tik Nawat

Kwak weli, shikaki tajtakwikalis. Uni yawi metzpalewia timumachtia ne taketzalis.

6. Maka shimajmawi su te yek tay tinatuk!

Shikelnamiki: su tikneki timumachtia titaketza yek, timuneki titajtaketza iwan sejseuk. Su timajmawi sujsul, te tiaw tiweli titajtaketza wan te tiaw timumachtia yek. Yajika mas yek ma te shimajmawi. Melka tina sejse tay te nemit yek, ne Nawataketza te yawi metzajwa, mas yek yawi paki ika tikneki timumachtia.

Su tikchiwa muchi ini tay ninatuk, tiaw tikita ka weli timumachtia nemanha. Maka shikelkawa!

Muishtijtuk tik se tajkwilul tik Inglestaketzalis itukay 7 Basic Language Learning Tips You Need to Know 


  • -ajwa regañar
  • amatachia leer
  • ishpinawa avergonzarse, dar pena
  • kenhaya! ¡es igual! ¡no importa!
  • -kupak garganta, voz
  • melka aunque
  • mumaka cuentaj darse cuenta
  • muneki ser necesario
  • tajkwilujtuk escrito
  • talul de prisa, rápidamente
  • tanutza = taketza
  • ush o

9 comentarios:

Alan dijo...

Sujsul yek, Gary! Nikpatak ika sejse tay titajkwilujtuk te mukakit yek ush nakat sujsul ujuij. Mugustoj ken naka ashan?

Alan dijo...

Aj, nikelkaw nimetzilwia. Nikpatak ne fotoj ika te niwelituya nikwi ne mupal. Te nikmati taika...

Gary Ordóñez dijo...

jaja. Yek nemi. Padiush ika tikpatak. Muita mas yek. Nugustuj.

Jaime Núñez dijo...

Muita yek, Gary. Niu-nikita mutajkwilul kwak nimukwepa ipal nutamachtiluyan.

Alan dijo...

Tesu "ipal"...!

Jaime Núñez dijo...

Neman tatka.

Anónimo dijo...

Tikchiwa sujsul yektzin ini se tajkwilul

Jaime Núñez dijo...

Gary, niu-nikchiwa muchi ka tiktajkwilujtuk. Sejse nikchiwaya peru ukse tesu, ika sejse wipta nimutalia ka te niweli. Tesu nimumakas.

Unknown dijo...

sujsul yek nawatia... nichiwa sejse ipal ne, ashan niamatchia ne esbozao gramatical de alan kin, nechpalewia pal nikmati ne masin jejjejejej!